فاطمه علاء تكتب : ملناش نصيب نِرسَى
جربت طوال حياتي الاختيار بالعاطفة ، منين ما يدق قلبي برسّي مركبي ، يمكن ولا مره العقل قالي ان انتِ صح ، بل إن طول عمره بيتخانق معايا ، وانا كنت اقوله استنى واهدى ، واتجاهل كلامه ع قد مااقدر ، طول عمري مبعرفش اوازن ، برمي نفسي جوا الشئ وكأنه آخر شئ هعيشه ، كأنه الشئ اللي استنيته كل يوم ، بعطيله منّي كل حاجه حلوه ، يمكن كل مره مكنتش بستنى مكافأة ولا نياشين ، كنت بستنى تقدير وحاجه تحسسني اني كنت صح ، طول عمري مستنيه اني ابقى صح ..
مرّت الأيام جوايا وخدت مني طبقات لحد ما بقيت هشه جدا ، مش حِمل صدمه ومش حِمل غلطه تانيه ، مع ان كل مره كنت ببقى حاسه اني صح بس اكتشفت ان الصح مش اللي انا شايفه انه صح ، عشان ابقى صح بجد كان لازم اختياري هو اللي يرد عليا يقولي اني كنت صح ، ودا اللي عشت ولسه عايشه عشان الاقيه ..
في وقت معين عند نقطة ما من الزمن والعُمر قررت إنه لا كفايه عواطف واختيارات اخرتها مش مضمونه ، وأن لازم امشي ع معايير المجتمع لأني مش عايشه ف الدنيا لوحدي واتدخل يا عقلي انقذني ، أو انقذ ما تبقى منّي ، جه اليوم اللي لازم أواجه فيه التغيير والدنيا اختبرتني ، واخترت للمرة الأولى بعقلي ، سلمت نفسي تماما وحبيت أعيش الاختيار دا بكل شئ فيّا ، كنت مستعده جدا لأنه يبقى الوقت الصح ، مستنيه أكون رسّيت مركبي ع البر اللي هيعرف ازاي يشعلقها فيه ، ازاي يحتوي كل فتفوته منها ويهدّي شراعها من العواصف اللي مرت بيها ، يطمنها ان خلاص بقى ليها سكن وونس ، بقى ليها وطن وبيت ، كنت مستعده جدا بكل شئ فيا ارجع تاني زي ماكنت قبل اول مره أُبحر فيها ومكنتش اعرف وجهتي ، مستعده بكامل ارادتي ورغبتي أنه يبقى المكان الصح ..
عدى يوم والتاني وانا لسه بكتشف تفاصيله ، ومن جوايا بدعي بصوت عالي يكاد يسمعه كل اللي ساكن جوايا ..
" يارب المرادي تبقى غير كل اللي فات ، يارب مابقاش غلطت للمره اللي مش عارفه هي الكام ، يارب انت عارف كل الكلام " ..
ولكن ويؤسفني اني اقول لكن المرادي كمان طلع اختياري زي كوم القش فضلت تدوب فيه الشمس لحد ما اتحوّل رماد ، بس المرادي كانت غير ، دخلت بآخر كل شئ ليا وآخر كل شئ فيا ، راهنت بكل ما أملك وأملي أفوز ، طلعت بروح مبقتش حتى قادره تسأل اذا كان العيب فيها ولا الرياح دايما كانت بتاخدها للاتجاه الغلط ، مبقتش حتى قادره تكتب آخر جملتين وتقول
عزيزتي المركبة الغالية ،
الظاهر كدا ملناش نصيب نرسى ..
للتعليق